خبرونه

 د سرپل ولایت د ښاري اوبو رسولو آمریت له لیدنې وروسته د ښاري اوبو رسولو او فاضلابو امارتي شرکت لوی رئیس ښاغلي مولوي غلام الرحمن «کظیم» د شرکت عملیاتي رئیس ښاغلي انجینر نصیر احمد «احمدي» او د شمال زون د ښاري اوبو رسولو ریاست رئیس ښاغلي مولوي عبدالربی «کامران» په ملتیا یې د اندخوی د اوبو رسولو له مدیریت څخه لیدنه وکړه.

په دغه لیدنه کې د اندخوی د ښاري اوبو رسولو مدیر د ښه راغلاست ویلو تر څنګ د ښار اوسیدونکو ته د یاد مدیریت د وړاندي شویو چوپړتیاوو راپور په مفصل ډول وړاندې کړ، او همدارنګه په دغه اداره کې مسؤلینو د هغو ستونزو او وړاندیزونه یادونه وکړه چې د اوبو رسولو خدماتو لپاره ګټور تمامیږي، چې د شرکت د لوی رئیس له لوري ورته یادو وړاندیزونو او ستونزو ته د رسیدو اطمینان ورکړل شو.

د دغې لیدنې په دوام د شرکت لوی رئیس  د اوبو رسولو مدیریت د اوبیزو سرچینو ، انتقالي، او توزیعي پروژو او امو-اندخوی نيمه کاره پروژې څخه لیدنه ترسره کړه ، او همدارنګه د ښار اوسیدونکو ته د مؤثرو چوپړتیاوو، د اوبو رسولو د پروژو د تأسیساتو ساتنې، او د اوبو سرچینو څخه د سالمې استفادي په اړه یې کارمندانو ته لازمې لارښوونې وکړي.